USA ka negusiyante gitipi sa mga armado sa probinsiya sa Maguindanao.

Giila ang biktima nga si Lande Saga, 47 anyos, minyo ug nanag-iya og gamay nga tindahan sa barangay Poblacion, Guindulungan.

Subay sa nahipus nga impormasyon gikan sa Maguindanao Police Provincial Office, nasuta nga banda alas 6:40 sa gabii, Nobyembre 9 samtang naglingkod ang biktima duol sa iyang bay, kalit lamang mibutho ang wala mailhing mga armadong kalalakin-an ug gipusil kini gamit ang M14 rifles.

Patay diha dayon si Saga kinsa naigo sa iyang ulo ug likod samtang ang mga armado dali nga miiskapo paingon sa wala matino nga direksyon.

Matud ni Saimillah, asawa sa biktima, nga duha sa mga suspek iyang nailhan, nga pulos naka-away sa iyang bana gumikan sa panagbingkil sa negosyo ug personal nga away sa ilang pamilya.

Nagpadala na og dugang puwersa sa kapulisan si PNP- ARMM Regional Director Chief Supt. Faizal Umpa sa Guindulungan nga magpatuman sa hugtanon nga seguridad aron dili na modako ang kagubot sa posibling binalsanay sa magka-away nga pamilya.

Giandam na sab sa mga otoridad ang kasong pagpatay batok sa mga suspek og warrant of arrest na lamang ang gihulat aron kini sikupon. (Edgardo Fuerzas)