USA ka habal-habal driver ang gipusil sa wa mailhing mga suspetsado samtang sakay sa iyang motor didto sa may Tagum Overland Transport Integrated Terminal, dakbayan sa Tagum, Martes sa kaadlawon.

Nailhan ang biktima nga mao si Jose Dinorog, 54, ug molupyo sa Phase 2, Union Village, Barangay Mankilam, sa siyudad.

Sumala sa report gikan sa Tagum City Police Station nga nahitabo ang pagpamusil pasado alas 3:20 sa kaadlawon didto sa nahisgutang dapit.

Giingong nagmaneho ang biktima sa iyang motor ug sa pag-abot niya tungod sa terminal sa Metro Shuttle Bus duha ka wa mailhing mga suspetsadong sakay sab sa motor ang mipusil kaniya gamit ang wa pa matinong kalibre sa armas.

Samad pinusilan sa kalawasan ang nahiaguman sa biktima kinsa dali nga gidala sa Davao Regional Hospital sa may Barangay Apokon aron mapatambalan.

Human sa pagpamusil ang mga suspek abtik nga misibat padulong sa wa matinong lugar.

Sa nakalap nga impormasyon sa Superbalita gikan sa balay tambalanan nasuta nga ang biktima nagpabiling anaa sa talandugon nga kahimtang.

Kapulisan sa siyudad sa Tagum mihimo na karon og dugang imbistigasyon sa hitabo.

Padayon pa sab nga giila sa kapulisan ang mga suspek ug motibo sa pagpusil.(Marvin Pineda)